الموضوعات الأكثر
ينعاك يا صقر العروبة عروبة
وينعاك شعبك يا زعيم الشهامة
والله يجبرنا ويغفر ذنوبه
ويرفع مكانه فالجنان ومقامه
وفي ذمتي ما طالت أيده جيوبه
اللي يبي غير الزعامة زعامة
ملوكنا اللي في البلاد محبوبة
اللي على نهج الرسول ونظامه
واللي بعد صقر العروبة ينوبه
ما دام في قصر اليمامة يمامة
مليكنا سلمان في كل نوبة
الهامة اللي ما انحنت لي هامة
وبيعة ولانا ورث ماهو بدوبه
عهد علينا لي نهار القيامة
لعظم ملوك الأرض وأشرف شعوبه
أصل العرب من هامته لي حزامه
والقاف في سلمان زاده عذوبه
عسى يليق بمستواه ومقامه
وقوة حرسنا فاللزوم محسوبه
أقولها في حرب ولا سلامه
نحمي وطنا في الشمال وجنوبه
ومن الخليج إلى سواح تهامه
ولبس الكفن مثل لبسه لثوبه
حتى نموت ولا تموت الكرامه
وبيت على سيسان ما نهد طوبه
وكلن يقوم بواجبه واستلامه
واللي مع الكفار يكشف عيوبه
ما للشرف في وجه مثله علامة
ومن لا يعرف الدار يجهل دروبه
وإن خاف دس الراس مثل النعامة
والشاعر اللي ما يجمل أسلوبه
يرتاح ونقول السكوت احترامه
الشاعر المقدم/ علي محمد الجذع القحطاني - الحرس الوطني في القطاع الغربي - لواء الملك سعود الأمني