الموضوعات الأكثر
في ليلة الجمعه جرت دمعة العين
والقلب من بلواه يشكي زمانه
فجيعة حلت بالادنى والاقصين
ومصيبة منها تضيع الذهانه
مات ابو متعب مات حب الملايين
مات الذي بالحق يصدح بيانه
مات المليك اللي يحب المساكين
مات الرحيم اللي شملنا بحنانه
مات الجواد اللي لجوده براهين
مات الذي بالطيب ما احد وزانه
مات الذي حكمه على منهج الدين
مات الذي بحكمته يكسب رهانه
مات الذي بالعدل اقام الموازين
ورحل لربه يرفع الله شانه
نسأل له من انزل تبارك وياسين
في رحمته يجعله بأعلى جنانه
من بعد ذا للقاف باقي عناوين
يا دولة التوحيد و أرضك مصانه
دولة لها عز ومكانه وتمكين
دوله لها التاريخ ينطق لسانه
وحنا بآل سعود والله حظيظين
ومعهم علاقتنا تزايد متانه
وحنا بخير بظل رب المسلمين
وظل الملوك اهل الوفا والفطانه
وموتوا بغيظ قلوبكم يالحقودين
ملك توفى وآخر جا مكانه
ندعو لميتنا وحنا مصلين
ونبايع اللي ارتكى للأمانه
سلمان هو تاج الملوك الميامين
سلمان رمز الفخر والمجد زانه
نعطيه بيعتنا على العسر واللين
وحنا له اطوع باللقا من بنانه
ومقرن ولي العهد صقر الميادين
الطيب ينبع والوفا من كيانه
والنايب الثاني بكل الأحايين
هذا شبل نايف شموخ ورزانه
وموتوا بغيظ قلوبكم يالمغرضين
حنا على الشدات معنا حصانه
ونحمي حدود بلادنا يالمعادين
عنكم يا أهل المفسدة والخيانه
واللي يعادي من تخدم الحرمين
باغي ولا له مبدأ ولا ديانه
عطاالله سليمان العطاالله - الزلفي