الموضوعات الأكثر
من حان يومه ما يفيده طبيبه
ولا أحد يردّه يوم تأتي اسبابه
سهم المنايا كل حي يصيبه
ولا يوم عاد اللي تنوشه حرابه
وما قدّر الرحمن ما به غليبه
ما حاد عنه المصطفى والصحابه
يا الله ياللي الكون تعلم بغيبه
يا منزل الماء من غمام السحابه
تغفر لمن فقده علينا مصيبه
يا رب تجعل في يمينه كتابه
عاهلنا أبومتعب عسى الله يثيبه
عسى ولي العرش يجزل ثوابه
عساه يسكن بالجنان الرحيبه
يا فارج الشدات خفف حسابه
اليوم كل الشعب ينعى حبيبه
الكل منهم جايح الحزن صابه
حزت لفانا العلم ساعه رهيبه
شعب الجزيره يجبر الله انصابه
شعبه من الحرقه جروحه عطيبه
ماحد يلومه لو يشلّق ثيابه
ما لوم قلب اللي تزاود نحيبه
عبّر باللي كنّه ضميره وجابه
على الذي ما يوم بار بصحيبه
اللي جمع عفه ولطف وحبابه
العاهل المحبوب ما داس ريبه
يطمع بعفو الله ويخشى عذابه
نبت على الأنصاف والعدل شيبه
عدل المناهج من بداية شبابه
الحاكم اللي يشكر الشعب طيبه
ذخر المواطن بالفخر يقتدا به
واللي يجيه بمجلسه يحتفي به
عنده جميع الشعب مثل القرابه
حلال عسرات الأمور الصعيبه
تخضع له الشجعان قدر ومهابه
الوايلي نسل الجدود العريبه
ما زال نذكر بالمنابر خطابه
مادامكم في خير ما هي غريبه
يقولها لشعبه ويشكر جنابه
عقب الفجيعه بالظروف العصيبه
سلمان في وقت الحرج يعتزا به
خليفته سلمان شعبه رضي به
الكل في سلمان يبدي اعجابه
الجود طبعه والفخر من نصيبه
والطيب سلمه والصخى يلتقا به
سلمان بالقالات يفلج طليبه
من صغر سنّه به نبوغ ونجابه
ومقرن شبيه السيف ما ينهويبه
عز الوطن ما خاب من هو هقابه
الحر الأشقر ماكرّه بالجذيبه
راس الجبل يصعد معالي هضابه
والنايب الثاني يمينه عطيبه
ضد الذي أمن المواطن عثابه
من عال ابن نايف محمد حسيبه
وضع على كل الدواير رقابه
نسل الزعيم اللي يضادد حريبه
عبدالعزيز الليث يوم المجابه
حد الوطن عذّي جوانب شعيبه
صنديد ما يقرب خصيمه لغابه
المقرني من ساس عزوه صليبه
من لابة آل سعود يا نعم لابه
وعند الختام القول نرسل نديبه
فيض المشاعر نرسله بالنيابه
- الشاعر/ عبدالله بن عبار