الزين ما يدري عن الحال والشوق

ليته يراعي ويترفق بحالي

العين تسهر والسهر يجرح الموق

والنفس يصلاها من البعد صالي

أمشي مع العربان وأطيح وأفوق

لكن خياله مايفارق خيالي

في كلمتي كني مضيع ومطفوق

والراس من كثر الهواجيس خالي

أهيم في طاريه وأهيم في الذوق

واضيع من بين الترف والدلالي

لامن دخل سوقٍ عثا في هل السوق

ويرخص له اللي في الصناديق غالي

إن جيت بسلى عن طواريه وأروق

جتني وصوفه في تفاكير بالي

أشغلني الماخوذ في كل طاروق

أشغلني بشعري وكثرة سؤالي

ماكن في جسمي شرايين وعروق

حسبي عظيم الملك رب الجلالي

برفوق يازين التواصيف برفوق

كثر الجفا كنه وقوع السلالي

حالي تغير والسبب شوف غرنوق

ولا قمت أميّز بين عمي وخالي

قولوا له إن البعد سبّب لي العوق

وكدّر على كبدي عذاب الزلالي

- محمد بن حامد بن مايقة