يا كثر الأصحاب يوم اللعب

والدشرة يوم الملاهي تدوّر من يلهيها

من أول شقتي بالناس

محتشرة يوم العزوبية الي كنت مغليها

واليوم لا عاد لا خوه ولا عشرة

الله ولا رفقة هذي تواليها

ناس مع المصلحة عشرة على عشرة

وان حدك الوقت حدت لك جنابيها

اللي حياته مع البيلوت والنشرة

واللي يحب الدشوش ولاهيٍ فيها

واللي على الخط دايم فاغر الكشرة

سمّاعته طول ليله ما يوطّيها

واللي مزاجه مع القصات والبشرة

ماله هدف والنصايح ما يدانيها

واللي مع الناس لا يفقه ولا يشره

شقراً مع الخيل لا هجّت تباريها

ذي عيّنه في شباب اليوم منتشرة

عسى الذي جابها من الأرض يمحيها

أهل المصالح معرّفتهم كماالقشرة

لا نظّف الراس بالصابون ينهيها

هذا كلامٍ علينا واجبٍ نشره

وما تحرق الجمرة إ لا رجل واطيها

- سعد بن جدلان