الموضوعات الأكثر
يا ابو الولد ياعايش بهم وازعاج
خذ هالنصيحة كان تسمح قناعتك
احذر ولدك لغيرك اليوم يحتاج
وفر له المطلوب فوق إستطاعتك
وخله خويك لاكبر مابه إحراج
يزود بره ويتفاخر بطاعتك
حذراك سجنه يخدعونه بالافراج
يغره اللي عوضه عن مجاعتك
وافهم ترى طيبك معه درع وعلاج
عن الردا كان المقادير لاعتك
حتى ترده عن خطر درب منعاج
وأفعال شرٍ حرّمتها مناعتك
مدحك نجاته لاوقع وسط الامواج
لو رافق الواطين يرقا برفاعتك
ونصحٍ سمع به منك في ضامره لاج
لاقلت له عند الموادع وداعتك
ويلقى به بعسر المساليك مخراج
دنياه لاضاقت لجا في وساعتك
ولا غير رب البيت لهدايته ناج
عسى توافق رحمة الرب ساعتك
كانه صلح يصبح له الدين منهاج
وان شذ تاه ولا تفيده شفاعتك
فهد بن عقيل الطويان - بريدة