من يستاهل الخوه ع الخير مرباه
دايم علي اليمنى خويه يصافيه
صدق التعامل دايم من مزاياه
وتواضعه بالنفس ماحد يجاريه
للخير كل الخير فعله بيمناه
وسيل المكارم عّز من هو يخاويه
صادق صدوق بحاضره وبخفاياه
ولا قال في هذا بغايب معانيه
انشهد انه غالي لا فقدناه
بالخير يذكر كل ما حل طاريه
هذا الخوي اللي على العز ممشاه
نعم الرفيق ونعم باللي يماشيه
في طيبته للغير هذي عطاياه
وافي مع الرفقه وغالي لغاليه
هذا الخوي اللي ع الطيب مرباه
دايم على اليمنى خويه يصافيه
- فهيد البقعاوي
