حنين

مدري وش اللي ساقها يوم قفيت؟!

يمكن كبرت وزاد فيني حنيني

اخذت اتمتم ليت يا ليت يا ليت

مافات من عمري ولا من سنيني

ارجع وانا الطفل الصغير اشعل البيت

ويادوب اخطي والدي يحتريني

وامي تدورني ليا عنّها ابطيت

وان جيت صبّت حبها الجم فيني

ياللي خذاك الوقت غفله وسجيت

اسمع وانا بيحت خافي كنيني

اليوم انا مانيب حيٍ ولا ميت

من حزني اللي فالصدر ممتليني

ياليت عمري قربهم كله افنيت

ادوّر رضاهم وهم نور عيني

يالله يارب البشر رافع البيت

تغفر لي وتجمعني بوالديني

- الشاعر/ خالد بن سالم التوم