بصمة ناعمة

هات يدّك خذ من القلب وحنانه

وإن بغيت تروح تكفى لا تردّه

خل قلبي يا ضيا روحي أمانة

كل شئٍ في غيابك باح سدّه

من جروح الوقت ماعندي حَصَانة

شامخ الصرح الممرد لا تهدّه

ماكسبت من الهوى غالي رهانه

مكسبي طيبة فوادك والمودّة

مالغيرك في دروب الحب خانة

طلبتي لك لا جمح بي الشوق هدّه

لمسةٍ من يدّك اليمنى ضَمانه

لاَ انحدر دمعه على وجنات خدّه

ولا تنكر للوفا راعي الخيانة

الوفي له وقفةٍ في كل شدّة

ما كرهت من الحياة إلا الإهانة

والكلام اللي توحش منه بدّه

والشعر يوم أمتطي صهوة بيانه

مثل سيل أهل اليمن صعبٍ تحدّه

الله اللي رافعٍ قدره وشانه

مالهاجوسي من الوقفات صدّة

شعر وشعورٍ ومحارة ودانة

ضمها شط الخليج وبحر جدّة

- شواهق نجد