الوسم
الوسم داخل يا سعد قبل يومين
على حساب اللي يحسب حسابه
متى نشوف البرق لاناظ بالعين
ونسمع رنين الرعد لا أقبل سحابه
عساه يسقي ارض الوطن قولوا أمين
حتى دكاك الأرض يروي ترابه
يمطر من الحره إلى حد يبرين
ومن منطقة نجران لحدود طابه
سيله حقاق وفيه بعض الودادين
من ماطره تمشي جميع الشعابه
يسقي مرابيع البكار المزايين
اللي لها عند النشامي مهابه
واليا مضى من ماطره حول شهرين
شفت الزبيدي في مجاري الدعابه
والعشب جاي له زهور وملاوين
شوفه وريحه ينعش اللي مشابه
يسقي ديار ممحله من زمانين
أشجارها يبست وصارت حطابه
معاد فيها إلا خياش ومراحين
لا شفت منظرها يجيني كأبه
وهيا منول مثل وصف البساتين
أشجارها خضراء تقول وصف غابة
الله يحفظ بلادنا منبع الدين
أرض الرسالة والنبي والصحابه
من دون حد بلادنا مستعدين
نموت من دونه ونفدا ترابه
من دونها نقطع رقاب المعادين
بالسيف والموت الحمر ما نهابه
هاذي عوايدنا منول وذا اللحين
الموت دون بلادنا مرحبا به
دار الكرم دار الملوك المسمين
تمشي على السنة ومحكم كتابه
- الشاعر/ سهل بندر بن حياد المقاطي
