على جال الغدير

وين هو فيّك وانا كلي هجير

انتظر فيّك ويحرقني هجيرك

وين ذاك البدر ما عود ينير

يا سما ميعادنا ليته ينيرك

يا السواني جف طرف وجف بير

كيف انا بشرب وجف اليوم بيرك

كيف ومن اول على جال الغدير

ما شكيت من الضما وانا غديرك

السفر يمك يطول ابه المسير

والسفر يمي يطوّل به مسيرك

والخفوق معلق بسلكٍ حرير

والعيون اللي يعذبها حريرك

من تفاصيل الحلا فيك الكثير

والقليل يضيع في زحمة كثيرك

ايه انا احبك ولا حبيت غير

ومن تظني يسكن اقصى القلب غيرك

- صالح السكيبي