زامر الحي

يا قصيدي ليا من عشت حلمك شجون

وذاب صدرك على صدر الورق من عناه

زوّد الهم والا صب ماي المزون

لا أن قلب الشقا ماني بعارف دواه

عندك الجرح عايش في ظلام السجون

فك قيده فديتك وش تبي من غثاه

اطلقه خله يجيني عدي لا يهون

يمكن الجرح مشتاق لعناق اخوياه

ازرق الدمع حاير في ضفاف العيون

لا بقى فالعيون ولا انحدر عالشفاه

زامر الحي ما اطربهم بعذب اللحون

لو تطيح الطيور الحايمه من غناه

يا قصيدي على ما جاك خلك حنون

واستر عيوبهم باطراف كم العباه

علهم من فراغ عقولهم يستحون

ويومنون أن بيت العز عزز بناه

واصل خطاك واشعل من جنونك فنون

ما بقى في طريقك غير حذفة حصاه

هات من كل شكل وهات من كل لون

واعتبر كل ما سووه ملح الحياه

لي عليك الوفا في صاحبك لا تخون

ولك علي اني اوصل بك لشط النجاه

لا ابتديت الصبر من حيث ما ينتهون

كيف افكر بطيب الوقت والا رداه

شفت ماعفت وان صافحت كف الطعون

ما بساوم على اللي غالي ٍ مشتراه

لو تعيش المشاعر حسب ما يشتهون

انشد الناس عن ليل العنا من سراه

- احمد ردة الحارثي