غاب نجمٍ
رثائيه في الشيخ فيحان بن مصوّي - رحمه الله
يابو خاشم غاب نجمٍ من نجوم عتيبه
من شيوخ الآد عاصي من دهاة الروقه
شيخنا فيحان ابن خاشم كبير الهيبة
خنجرة تسيل دم ومرحبا منطوقه
عادةٍ له ما يسيبها ولا به سيبه
من ثمان عقود مرّت مايعرف البوقة
كل ماشاف الضيوف يكرر الترحيبة
وانطلق تقول حر مطلقات سبوقه
يعطي الخيل الأصايل والبكار وجيبه
فزعة المضهود والمحتاج رابح سوقه
فوق بذل الجاه حل المشكلة من جيبه
كم حمولٍ شالها وصكوكها موثوقة
دام فيكم واحدٍ مثله مافيه مصيبة
العيال اعطاهم اصل العلم من صندوقه
مجلسه خلوه عامر بالدلال وطيبه
والشحم لا تفقده صينيته مرزوقة
اعرف ان الكل منكم حاميٍ للغيبة
واعرف ان الطيب فيكم ماتغيب بروقه
نطلب الله يرحمه ويبيح هاك الشيبة
يدخله جنّة عدن وأثمارها من فوقه
في نهار العرض يغفر له ويستر عيبه
ينزل الفردوس مكفوله جميع حقوقه
والعزا لعتيبه الهيلا برجل الطيبة
فالشمال وفالجنوب وغربنا وشروقه
- تراحيب بن سويلم العتيبي
