عقد الجواهر
قال من هو يبدع الشعر من صدق الشعور
شاعرٍ نفسه تعبر عن اللي عانته
فكرته يتعب عليها ولو غاص البحور
مثل بحارٍ تعب لين حصل دانته
واعتبرها كنز يبقى على مر العصور
ورث للي من عياله يحفظ امانته
واثق إن الدانه اللي لقاها ماتبور
لو نظّمها وسط عقد الجواهر زانته
كان ما للشعر دافع سوى حب الظهور
اشهد إنه طاح بيدين ناسٍ خانته
والغشيم اللي سرى في الظلام بدون نور
ما سمحنا له علينا يسوق ميانته
كلما جانا تحدر مثل سيلٍ حدور
يطلق لسانه ولا يعتني بصيانته
إن لقى فتنه نبشها مثل نبش القبور
لين شك الناس في منهجه وديانته
يحسب إنا ماقرينا الذي بين السطور
قام يرطن عند ناسٍ تفك رطانته
ما درى إن مفقد الهرج من ضمن الحضور
لين جاب الهرجه الغايبه وأدانته
له بطانه ما تدور له إلا خس شور
وش نكب باشة هل النيل غير بطانته
اوهموه إن الحصانه لها هيبه ودور
والنهايه صار محبوس في زنزانته
عادة المغرور ما ينكبه غير الغرور
من يهين الناس يبشر بقرب إهانته
جل من هو حط الإنسان في دنياً تدور
لاجل يفهم كيف دارت ويحفظ خانته
- عبد الله الطلحي
