المرقب النايف

عديت من ضيقتي بالمرقب النايف

وهموم صدري.. تلاطم مالها ضفّه

روحي حزينه وصبري جرف مهايف

وقتي حداني مابين الجال والطفّه

اغفاي طرفي مثل تغميضة الحايف

اللى من الخوف قلبه صايبه خفّه

فزيت مفجوع مدري ويش انا شايف

وجيه متشابهه.. وظنون ملتفّه

مليت اجامل مع الطرقه وانا عايف

من خوة اللي يصير بخوته لفّه

اللي عن الحق يمشي دربه مسايف

وأفكاره المزعجة بالدور مصطفّه

لو ان صدري من الدمام للطايف

وشلون ابا إصبر وقلبي مالقى شفّه

كني صويب بجوف المعركة خايف

صابوه فرسان قوم تاسم الكفّه

- رشيد محمد الفريدي