دلاله على النار مركاه
البر احبه واعشقه واتمناه
فتقٍ بوسط القلب مغرم وهاوي
ياما على الموتر قطعنا شغاياه
منتوجة اليابان وارد عراوي
والاّ على جيبٍ فريده مزاياه
كل مانخيته صال مثل الفداوي
ابعد به همومٍ على القلب مركاه
اقطع به عروق النوازي خلاوي
ابعد عن اللي خافقي دوم يشناه
وعن مجلس الحقران واهل الشناوي
البر فيه الصيد والقنص مخباه
البر عندي من كبار المناوي
شوفة هل الذيدان والبل والشاه
بين الحزوم السمر خلف الشواوي
وامشاهد مزونٍ من الغرب منشاه
غربٍ يجاذبها وشرقٍ يلاوي
وامهاوز أجوال ابرق الريش مشهاه
تجلي عن القلب المشقى بلاوي
مع قطعة عيالٍ على الدين ممشاه
كلٍ على الثاني رفيقٍ فداوي
هذا يشب النار والثاني احذاه
كسّر جراميز الحطب له رهاوي
والثالث دلاله على النار مركاه
فوّح معاميله على جمر ضاوي
والرابع اللي جاب كبشٍ وذكّاه
ودّه يسوّي للجماعه مشاوي
والخامس اللي ماتونّا مطاياه
كل ما دعيته فز مثل النداوي
وإذا غشانا الليل وارخى سجاياه
تلقى الشعر ما بين شاعر وراوي
وسوالفٍ فيها العبر والمعاناه
وذيب الخلا فوق المراقيب عاوي
في خايعٍ صفر النواوير تزهاه
آخير من جلسة بيوت وقهاوي
البر احبه واعشقه وآتمناه
حبه امنزّل في خفوقي سماوي
- الشاعر/ نايف العبيد
