هديّة لأهل المجد
باسم الإله اللي على العرش معبود
اللي رفع سبعٍ وسبعٍ تحتنا
اللي سجد له بآخر الليل داؤد
ونزل كتابٍ من حروفه لغتنا
الله يجنبنا عمل كل منقود
يا رب تجعل بالهدى خاتمتنا
هذا وابقطف مع هل الشعر عنقود
بأبيات أركزها حسب معرفتنا
مني هديه لأهل المجد والجود
للأسره اللي حاكمه مملكتنا
أنجال ليثٍ خلّف أشبال وفهود
قيادنا اللي وّجهوا قافلتنا
اللي وفاهم له براهين وشهود
بجهودهم كل الدول صالحتنا
نصارة المسلم على كل نمرود
أفعالهم بالمجتمع شجعتنا
حكام ياصل وصلهم كل مضهود
هم درعنا الضافي وفيهم ثقتنا
وحنا لهم ذرعان وأكتاف وعضود
وافين لامن الدواعي دعتنا
معهم لنا وقفات بالهون والكود
شوايب الأفكار ما غيرتنا
شبابنا واللي بالأحضان ممهود
مع راية التوحيد لاعمدتنا
والرايه الخضراء لها العز موعود
باسم الجلاله صوتنا ولهجتنا
إسلام والإسلام له شرع وحدود
وأعدل حكومه بالعدال أحكمتنا
وأهل الوطن لقيادته شعب وجنود
وبالدين وأحكام الشريعه صلتنا
إسلام ما يدخل بنا شك وصدود
عشنا على الملة وفيها نبتنا
ملة رسولٍ جاهد الشرك بجهود
اللي على هديه تسير أنظمتنا
وإن كان به ناس لنا ضد وحسود
نار الحسود بخافقه ما أحرقتنا
حنا العرب وأهل الحسب ساس وجدود
بمقدمة مجد العرب مرحلتنا
ما نال منّا ساعي الشر مقصود
ودعاية الأحقاد ما زعزعتنا
- الشاعر: بدر الحويفي
