حديث المزون

يا بَعَدْ من يجون.. وكنّهم يبعدون

جيت لي من هناك، وكنت عندك، هناك

يا هلا كثر.. والفرقى جروح وشجون

كثرهن يا هلا بك.. يا عساهن فداك

لا تحيِّر.. وردِّ الباب دون الظنون

وادخل القلب ما به غيرك إلا غلاك

هايمك ما يخون.. وعزته ما تهون

وانت لو كنت مثل اللي نساهم، نساك

والله اني ما اشيل الهم لو ما تمون

لا، ولا شلت جمر الشوق لو ما زهاك

يا.. قليلة عليك إن قلت لك يا حنون

أنت -ويا كثر حبك- كثر حبك ملاك

كنت أحبك خيالٍ ما حسبته يكون

كيف ما دامك أحلى من خيالي هذاك

النظر لك، وقلبي لك، وحبي جنون

وأنت بالقلب، والا بالعيون، بهواك

يا شبيه.. أو سواك بوصفهم يشبهون

كيف أشبِّهك باللي ما وصل مستواك؟!

ودِّي أسمع.. وابسمع من حديث المزون

لا تنقَّى الكلام العذب تظلم شفاك

حدِّك الروح.. يا غيث الحنان الهتون

وكان ما أمداك عمر الوصل عمري، مداك

وإن سهيت، وخذتني لك وعنك العيون

وشهو أحلى من السَّجة بدنيا بهاك

كان ذا بعض وصلك، جعلهم ما يجون

وكان ذا بعض زينك، وش تركت لسواك؟

- الشاعر/ محمد صلاح الحربي