الشعر الشعبي
كتب - عبدالعزيز بن سعود المتعب:
ترتفع هامة الشعر الشعبي عالياً ويعلو شأنه وتزخر معانيه بالولاء والوطنية والشرف والعز والسؤدد والرجولة الحقّة في تجسيده لمحبة أبناء المملكة العربية السعودية قاطبة لمقام سيدي ولي العهد صاحب السمو الملكي الأمير سلمان بن عبدالعزيز -أطال الله عمره وأدام عزه- أمير الوفاء والمؤرخين والمواقف الكبيرة مع الجميع على كل الأصعدة.
***
يا راعي العوجا
«بمناسبة إطلاق اسم العوجا على مزرعة سمو ولي العهد -حفظه الله-:
يا راعي العوجا وساكنها
يا مرحبا يا قايد بلاده
أبو فهد للدار ممّنها
سلمان عز الملك وامجاده
من يوم حليتو مساكنها
كمّلت عهد المُلك والقاده
ماهي غريبه منك تسكنها
بصمتك في التاريخ معتاده
وادي حنيفه حكمكم منها
علمٍ ولا يحتاج نشّاده
أجدادك الندّر معادنها
أنهت عروش الباشه الساده
يوم الفتن ثارت براكنها
وقفوا كما الجلمود واوتاده
الحر ما يسكن مطامنها
روس الشواهق ماكر اعتاده
- الشاعر/ محمد بن عبدالرحمن الصفيان
***
فعلك ينومس
تستاهل التقدير يا راس سلمان
بك تنتخي دوله وبك ترتفع روس
لك بالقلوب البيض يا سيّدي شان
الجهد جهدك للمواطن وملموس
على عرينك تسهر عيون شجعان
ناخذ بتوجيهك تجاريب ودروس
فعلك ينومس والقياده لها اركان
والعز بصدور الرجاجيل ملبوس
بانت لنا الأيام والمختفي بان
من حكمتك ما همنا كل مدسوس
بشتك لحاله باللواهيب مزبان
يجيك من جاله مع الوقت هاجوس
تستقبل الشعب السعودي بالأحضان
حارس على شعبك وبالخير محروس
- الشاعر/ محمد العريعر
***
يا معجم التاريخ
سلامتك في كل ذهاب واياب
يا ولي عهد المملكه يا سندها
سلمان لا من غاب غاب السعد غاب
دارٍ يغادرها يغادر سعدها
له في قلوب الناس فرحه وترحاب
الشوق دافعها وحبه مددها
خمسين عامٍ فاتح للعدل باب
عاده من الراس الحكيم اعتمدها
ايقابل الشاكين ويحل الانشاب
تكبر ولا جاته تموت بمهدها
وان غاب عن لنظار تشتد الاعصاب
لأيام نحسبها ونحفظ عددها
ماحط بين الشعب فئات واحزاب
مواقفه كلٍ عليه يحمدها
يا مختصر كل الاسامي والالقاب
يا رافع الرايه مثبت عمدها
يا وجهة الانظار من كل الأقطاب
وهبه من المولى توجه وحدها
كل الشعوب اصحاب واجناب واغراب
كنه يدير امورها في بلدها
يا سيفنا المسلول ابوحد ونصاب
لا طالت اعناق الخوارج جلدها
على الشريعه ما على حده جراب
تقصير امدها خير من طول امدها
يا معجم التاريخ في علم الانساب
يا مرجع الكتّاب واللي بعدها
وان صار اخذ ورد في بعض الاسباب
اتحلها يابوفهد وتعقدها
يا ضاربٍ اروع مثل خلق وأداب
لا ضاعت اخلاق الأخوه وجدها
تدعيلك الركّع على كل محراب
والأرمله واللي فدتك بولدها
ويدعيلك الشايب ويدعيلك الشاب
في ركعته في سجدته لاسجدها
محبتك طوقٍ على كل الأرقاب
طوقٍ ينوّرها ويبعد حسدها
مكانتك بين النواظر والاهداب
يا الله عسى طلّتك مانفتقدها
- الشاعر/ عبدالرحمن أباالجيش
