منّة الغير

البارحة مع ورادات التفاكير

أخذت لي مع كل تفكير ساعة

هذي مواريدٍ وهذي مصادير

ماغير أواجههن بعزم وشجاعة

وردن مثل ورد الضوامي على بير

ولالي على بعض الهموم استطاعة

أجزر الأيام والوقت تجزير

واصبر ولو شفت الجفا والقطاعة

ولاكل من قدر يقابل بتقدير

ولا فيه راعي مال يرضى ضياعه

وبعض الكلام يفور الدم تفوير

الضغط بالشريان يصل ارتفاعه

ولاني وكيل آدم على غلطة الغير

لا شك أشوف الوضع زاد اتساعه

وبعض المجامل نوب شرٍ بلا خير

يطمع بك اللي مايعرف الطماعة

اشوف وقتٍ غيّر الناس تغيير

شاخن حصانيته وذلت سباعه

والناس يوجد فيهم الشر والخير

ومن ينصحك واجب عليك اسمتاعه

ولا فيه مر امر من منّة الغير

ولا به غنى لا صار مابه قناعة

ولا فيه الذ وزين من نية الخير

وملاكعة من فيك سوى لكاعة

- إبراهيم مبروك العازمي