إلا 3 و4 %

يا هاجسي لغم لي القافيّه

نويت اسوي بالغزل مرثيه

معاد به حبٍ شريف وعذري

إلا ثلاثه واربعه فالميه

كلٍ من الشعار يشكي فرقا

على حدود النبره الصوتيه

كلٍ يبي شوف الوليف الغايب

اللي رسم لأحلامه الورديه

حتى لو إنه ما عرف محبوبه

يرسم خياله قصةٍ وهميه

حتى ربط حزنه بصوت الورقى

اللي تجر لحونها عصريه

لو المحبه كلها مصطنعه

ولى حقيقة لحظةٍ منهيه

كلٍ يلمع صورته ويغني

كن المشاعر بالغزل معنيه

يا معشر الشعار ما مليتو

ولى دخلكم بالغزل جنيه

مافيكم اللي شاف حال الأمه

ولى نشوف بنظرةٍ دونيه

حال امة الإسلام ما يرضينا

بأحزانها كم قصةٍ مرويه

الجرح واضح والعيون تشاهد

وقلوبنا بصدودها مبليه

تقول كن الأمر ما يعنينا

ولى جهود إسلامنا منفيه

وإنا جسد واحد وهمٍ واحد

وآمالنا مع بعضنا مبنيه

وليا انجرح مسلم وما دافعنا

عارٍ علينا نطلب الحريه

- عايض أبوشيبه السبيعي