موضي البسام

يا الخيّرة موضي البسام

يا مفخرتنا بهالديره

على عنيزة تراك وسام

من طيب الأفعال والسيره

الطيب لو قسموه أقسام

حطوك بأول مشاويره

لو راح لك كم عام وعام

الطيب ما راح تذكيره

يوم ان طير المجاعة حام

والجوع لجّت مناشيره

لولاك ما ظن حيٍّ قام

جيتي من الله بتدبيره

يفداك من هو قليل ارحام

ما داخلت نفسه الغيره

على المساكين والأيتام

رداه دايم وتقصيره

حقك علينا وفا وإكرام

مير العرب يالله الخيره

هذا صدودٍ وذا لوّام

وذاك همه دنانيره

والمال لو جمّعوه أكوام

ما طوّل العمر تكثيره

لا راح يومٍ من الأيام

يشوف شره عقب خيره

دنياك هذي وهَمْ وأحلام

ما يجهل العقل تعبيره

أجرك على الواحد العلام

تدرين ما ينفِعِك غيره

تلقين حسن العمل قدام

يوم الخلايق بها ذيره

عساك في روضةٍ وأنعام

في جنةٍ كلها نيره

- محمد العبيدالله