جمعت لك

جمعت لك كل الحكي كل الحكي والسالفة

جمعت لك كل الذي ينقال واللي ما يقال

السالفة انك حروفٍ بالصدر مترادفه

وإن جيت أرتبها تناثر بالحقيقة والخيال

ما نيب أحبك بالحكي ولا هوب دمعٍ ذارفه

أنا سوالف مرّتك من هالجنوب وهالشمال

الله يا هذي الحروف ما وقّفت لك هادفه

مثل النجم لا من هوى بأحضان وصدور الجبال

يا انت والأحلام وقت يا ليت يوم أصادفه

اشتقت له ما مرّني قلّه ولو مرّه تعال

بكتبك بيتٍ من شعر وأقول له كيف آصفه

ويقول ليلٍ سرمدي أو شمس ما تعرف زوال

العين والقلب فهواك يا صاحبي متناصفه

مثل السماء تعطي حقوق النور وحقوق الليال

مشاعري يا موعدي والله منّك خايفه

مثل الذي يرجى من البارحة ولو لمحة ظلال

أحدّثك بأمر الغلا ولا قلت شي تخالفه

طال العناد اللي أبد ما فرّح دروب الوصال

وشلون بخفي هالغلا وأنت الغلا لك عارفه

وأقول بجمع هالشتات وتقول تضحك ذا محال

المشكلة تعرف غلاك عشقٍ بصدري والفه

وكلّي يا كلّي فالهوى هيمان بك يا ابن الحلال

اترك جروحٍ بالحشا وانشد جروحٍ طارفه

بجاوبك عني وأنا بسألك لو مرّه سؤال

وينك بعيني دمعةٍ في وسط عيني واقفه

رد الوصل لا لا تصير العين لك جرفٍ هيال

كن السما بردٍ نسى موعد لقاء في سالفه

بعطيك في ليل الشتا هالقلب ولاّ شوق شال

الأمير الشاعر: د. سعود بن عبدالله