موتي وانا حي

كلمة سلام.. وصباح الخير كثرها

ترى لها وقعها في نفس مجنونك

ودي تروووح وتجي حتى تكررها

ماامل منها ولامن مشاهد عيونك

عيونك اللي قلوب الناس تاسرها

من شافها تفتنه ويصير مفتونك

موتي وانا حي يستوطن محاجرها

مابيني وبينه الا غمضة جفونك

جابتك لي صدفةٍ مدري وش آخرها

وانا تركت الجميع وقلت ممنونك

سلمتك الروح تنهاها وتامرها

ياللي خواتك على زينك يحسدونك

لك صورة برهنت عظمة مصورها

عجزت اوصفك واتخيلك وشلونك

لك هيبة ماتخليني اناظرها

ارفع لك الشوف مير يطيح من دونك

ابطيت وانا المشاعر عنك ساترها

وانته تبختر وتاخذني على هونك

واليوم جتك المشاعر هي وشاعرها

متقاسمين الوجل وشلون يرضونك

كلي امل ماتجي مكسور خاطرها

وانا اوعدك ماتخونك فيه ظنونك

والا اعتذر وارفض الاشواق وانكرها

وارتح وخله يزود هبال مجنونك

- لافي حمود الغيداني