بيت القصيدة
حي العلوم اللي تجي عن عقيدة
اللي تجي مامن وراها مقاصيد
اللي مصادرها العقول الرشيدة
عز الله إنه ما لحقها مناقيد
الراي راشد والمصادر جويدة
إن كان جا في العلم نشدة وترديد
هذا الطلب هذاه بيت القصيدة
هذا الذي تشهد عليه الاجاويد
ترى السعادة والحياة السعيدة
في طاعة اللي يبدي الخلق ويعيد
سامع دبيب النمل مفني البديدة
سبحانه اللي ينقص العمر ويزيد
من يمهله ربي ليالي عديدة
لايحسب ان العمر من دون تحديد
عمر الفتى تراه فرصة فريدة
ماكنها الا فرصةالقنص والصيد
يحط من زين العمل في رصيده
قدّام لايلفي صدوق المواعيد
قدّام لايثني على الرِجل قيده
ونصير له مثل الجمال المقاييد
في يوم ما ينفع عضيدٍ عضيده
كلٍ يدقق له حسابه على حيد
إما شقا والا حياة جديدة
ما بين وديان العسل والعناقيد
في جنة من حظ صفوة عبيده
ما هيب من حظ العصاة المقاريد
لكن أبا اطلب واحدٍ ما يكيده
بامره يجردني من الذنب تجريد
أطلع ولا عليّ سيّه وحيدة
أخير ما حصلت وأخير ما أفيد
- فراج الكرشمي
