تاهت الخطوات

يا قصيدي دام خانتني الظروف

ليه ما تفزع وتوصف موقفي

قلهم كيف العبت بي هالظروف

وكيف أنا بالعمر ضيعت أهدفي

العمى.. ما هو بشخص ما يشوف

العمى... من نور قلبه منطفي

حالف اني للردى ما اسعى واطوف

دام لي راسٍ تشيله اكتفي

وما على الماضي بقاموسي حسوف

وما ني لباكرٍ شغوفٍ أو شفي

والسؤال اللي ذبحني ما يروف

هو سؤالٍ اسفل ضلوعي خفي

ان بغيت اروي ضمايه بالكفوف

تعجز كفوفي وشوفي ينكفي

لا زمن يرحم ولا حظٍ عطوف

ولا وليفٍ في وليفه يحتفي

العمر يمضي وحنَا في وقوف

انتأخر.. وانتأخر... وانهفي

تاهت الخطوات والدرب معروف

ومن يلوم الرجل لوهي ترجفي

خلني صايم ولا زادٍ بخوف

القناعة ما هي كنزٍ لي ضفى

وكان يا نفسي عطشتي من الظروف

اغرفي من هم صدري وارشفي

- الشاعر/ عمر غربي العنزي