أحب القنص و الصيد
يقولون بعض الناس لي وشتبي بالجيب
وانا أقول غير الجيب ما فيه سيارة
رفيقٍ ليا احتجته لقيته واعز اصحيب
ينومسك لامنّه مسك خط مشواره
عسى من صنّعه وورّده ما يجيه العيب
لونّه من الكفَار يا مطيب افكاره
صناعة خبيرٍ ما تبي صنعته تجريب
تفوق بصنعه لين غطَّا على غاره
فخامة وقوّة كنّك مرتّبه ترتيب
من ركون صدّامه اليا شمعهّ انواره
اليا أقبل وجه بنتٍ تحرّا لها خطيب
هنوفٍ لها كل العشاشيق سبّاره
تحرّى لها شيخ يجيها من المغيب
فتى أحلامها اللي غايبٍ تسمع اذكاره
على اللي يبيه ولا قدر يشتريه تعيب
الى صار ما يقدر على باهظ اسعاره
لا منّي بغيت الدرب فوقه مهوب صعيب
عليه أقطع الوديان والنفد والقاره
ليا طاح نو الوسم ثم سال كل شعيب
وصلناه لين نشوف نبته ونوّاره
أحب القنص والصيد ما فيه شك وريب
ليا صار مع ربعٍ نشامى وصقّاره
وشوف الحباري هو منايه يا بوشبيب
وتفريعة القرناس في بر وطياره
تفرّج همومي يوم اشوف النجوم تغيب
بعيدٍ عن الكهرب بعيد عن الحارة
إلى امسيت في جوٍ خلا مدهلن للذيب
اخيل الكواكب والبلد مسمع اخباره
على جال نارٍ تصطلي مثل نار كليب
يلاحق حطبها واحدٍ ما طفت ناره
عليها ثلاثة دلال والرابع الحليب
ليا أقبلت ما احلى ريحة البن وبهاره
سوالف وسجّة بال ومرافق أهل الطيب
تخفف هموم داخل الصدر محتاره
- الشاعر/ سهل بن بندر المقاطي
