عناد النزف

إن كان لك نيَّه تودعني بجرح

تكفى بجرحٍ ما يشافيه غيرك

ما ابغى الجروح اللِّي تساوم على الصلح

أبغى (عناد النزف) بعدك يثيرك

قوّم رياحك حَرّض الرمل والملح

تملى العروق المبطيه من غديرك

ماني مبدِّل فيّةْ النخل بالطلح

إن مال ظلِّك مالي إلا هجيرك

قلبي بلادك لا غزو بعد.. لا فتح

ما خِلقْ بعد اللِّي يسهِّل عسيرك

جمعت منك أضداد ما تقبل الطرح

ما اشكي قساك إلاَّ لناعم حريرك

وفاك فيما كان مدحٍ على مدح

لو كل شرَّك ما يجي بعض خيرك

لي عام.. لي عامين لا حزن لا فرح

ما أدري وش اللِّي بين غصني وطيرك

كان الوداع - إجرح- ولا تطلب الصفح

والله عطاك ايلين يصحى ضميرك

- الشاعر/ مهدي بن سعيد