عطني صبر

عطني صبر واعيش لك.. لو عاش حرماني معي

وفا السنين الماضية نفد معه كل الصبر

عطني وعد.. قبل يصير الحلم بعيوني نعي

وان خانك الحظ الردي.. ما خنتني خانك عذر

أنت الرفيق برحلتي وأنت الغرام ومطمعي

كل الليالي ليلتك يذوب قلبي لك سهر

أخلق سبب لمجادلك يطرب لصوتك مسمعي

وبالعين حابس صورتك اشوفها كل الصور

وجه الحياة بناظرك يرسم أماني مطلعي

وليل الشعر لو ينتثر بعثر ضيا خد القمر

نسيت نفسي فيك لو تشهد سنينك مصرعي

كيف اطردك من عالمي مادمت تفكير الفكر

لو ما أقول احتاج لك يذيع سرّي مدمعي

عين الغلا لو كابرت تفضح تفاصيل الخبر

حبيب عمري خافقي وحروف حبك أضلعي

تسري بدمي واكتبك اعذب حكايات العمر

أجمل وهم عشته معك.. على أمل لحظة وعي

وقّف زماني ساعته.. ليه الزمن ما ينتظر؟!

الشاعر: الأمير د. سعد آل سعود