شاعر وأكثر من صورة

سهر

يالله ياللي بيدك الضيق وافراجه

ياخالق الخلق يا قاضي حوايجها

افرج لعينٍ إلى غضت بسوهاجه

تجهز عليها الطواري لين تزعجها

**

اثار

الحب تأثيره على القلب سلطان

جاير ولا راعيه للعذل بمطيع

وأول مداخيله على قلب الأنسان

تجاذب النظرات بين المواليع

**

حال

ما ادري على النوم عيني وش مكلّفها

للسِهْر في نونها ممسى ومقيالي

واللي جعل نوم عيني ما يوالفها

واهج لهيب الغرام اللي برى حالي

**

عذوبة

يا راعي الغر العذاب المباهيش

رش الكبود اليابسة عن عطشها

دنق عليّ وطمّن الراس بشويش

واحي العروق الذابلة وانتعشها

- عبد الله بن عون