قلطة
من شعر القلطة بين الشاعر مطلق الثبيتي والشاعر شليويح المطيري، مشاركة من الأخ فهد العصيمي - الطائف.
مطلق الثبيتي:
جيت بالطاسه وتبغى تحلب الجاموسه
مار حطت فيك جرحٍ مانت عارف طبه
وانت لو تعرف جموع الغرسه المغروسه
ما رميت اغصانها في نارك المشتبه
شليويح المطيري:
ما نلومك لاقي لك كبسة مكبوسه
مار من يعطيك من زاده لزوم تسبه
انت ذيبٍ لاقي لك صيدة مفروسه
قد فرسها ذيب والريع المقابل ذبه
مطلق الثبيتي:
لو علمنا عن خفايا الخطه المدروسه
كان نهوي فوق راسك صبح بالمرزبه
وانت راسك بين نيبان الجمل وضروسه
والجمل يلعب على العربان ما تلعبه
شليويح المطيري:
الجنون بوسط راسك كلها محبوسه
ولو كويتك كان طابت رجلك المنصبه
الحرامي ما انت سارق مزهبه وفلوسه
لو تشيل الفرد والسكين تحت الجبه
مطلق الثبيتي:
لو سلمنا من لسان الحيه الملحوسه
انفتح باب على جنبه تلوح الضبه
وانت قدامي تشيل الرايه المنكوسه
مار من يتعبك يظما قبل يأتي غبه
شليويح المطيري:
انت ما جاز لك كيف الطبخه المحموسه
عقب هذا كل رجالٍ يقوم ابنبه
وانت ضيعت العرب بأفكارك المعكوسه
كل ما قلت لك هات الملح جبت الشبه
