الدنيا الفتون
يا صاح روحك سقمها من سببها
هامت بخلٍ قاسي القلب خَوّان
شوقك فتون وكل غِمرٍ خطبها
مير البلا في كل يومٍ لها شان
تعطي وعد لا شك محدٍ غصبها
تضحك معك يومٍ ويومٍ مع فلان
نسمة هوا.. محدٍ بكفه قضبها
ومهرة فلا.. عيّت تبي سرج وعنان
محدٍ ملكها غير ربٍّ وهبها
حبٍ تقضّب في معاليق الإنسان
كل يطالبها ولا أحدٍ غلبها
تعطي بزودٍ مَرْ.. ومَرٍ بنقصان
أحدٍ نهض حظه ووافق شببها
وأحْدٍ تحيَّر في تصاريف الأزمان
وأحْدٍِ ملا منها حياضٍ شربها
وأحْدٍ غدا يطرد سرابٍ وضميان
وأحْدٍ بنى بيته بخاوي كَرَبْها
وأحْدٍ قدر يبني بصلبٍ وصوَّان
وأحْدٍ كسته الماس وأحْدٍ ذهبها
وأحْدٍ غشاه من الفقر هم وأحزان
وأحْدٍ تركها عاجزٍ عن طلبها
وأحْدٍ لقى عنها بديلٍ وسلوان
وأحْد من الحاجة نياقه جلبها
من دون سوْمٍ باعها بأرخص اثمان
وأحْدٍ من النعمة نياقه حلبها
فوقه مزون الوسم ديمه وهتان
هذي حظوظ الخلق والله كتبها
عدلٍ على خلقه كريمٍ ومنَّان
يا صاح لو هي بالمراجل جذبها
أهل الشكاله والشهامة بالأرسان
ولو هي على ظهور السبايا كسبها
كل ابلجٍ يقلط على حوم الأكوان
ولو هي بشوراتٍ ورايٍ حسبها
حاذق وراشد راجح الراي ميزان
ولو هي بهداتٍ وحوفٍ ضربها
كل اشقرٍ ضاري على كسب الايمان
إن اثمرت بارضك ولوَّن رْطَبهَا
فاصْرِمْ عذوق نخيلها والسَّعَدْ حان
واذكر تراها ما تخلي شغبها
واحذر وجالدها بحمدٍ وعرفان
واغنم بها دام القدر ما نهبها
نبعٍ مساييله سبيلٍ لعطشان
غيث القلوب اللي يفرِّج كْرَبْها
وحيٍ من المولى حديثٍ وقرآن
يا صاح شوقك ما تساوي تعبها
ورزقك تراه بكف خلاّق الأكوان
ساعة.. وتقضي لا يغرّك طَرَبْها
وَمْضَهْ.. ويصبح كل شيٍّ بَهَا فان
- الأمير الشاعر/ خالد بن سعود الكبير
