يالله تجعلنا من أصحاب اليمين
يا صاحبي بوصيك جعلك في نعيم
تجاربٍ ماهي جديده من سنين
لا تشتكي للخلق كان إنّك فهيم
ولا تهين النفس تلقى الشامتين
شكواك للخلاّق في ليلٍ عتيم
في سجدةٍ والناس عنك نايمين
داحم على الزينه وذا مطلب سليم
دايم وخلّك في صفوف الطامحين
والمزح لامن زاد عن حدّه ذميم
يمكن يسبب جرح في الداخل دفين
واحذر تخاوي واحدٍ طبعه لئيم
ودوّر خويٍ معك في عسرٍ ولين
ولا تقول فلان خلٍ لي حميم
إلاَّ بعد ما تجرِّب إنّه لك عوين
احذر من الحسود تتخذه نديم
سواد قلبه في عيونه لك يبين
وإذا وعدت أوف الوعد فوقك عليم
يعلم بخافي النفس واللِّي مستكين
ومع الأقارب خلّك إنسانٍ حليم
ولوصلهم لا لا تهاون أو تلين
وعند المصاهر دوّر المربى السليم
زين النسب ينفعك في دنيا ودين
ورزقك محدّد لو تركض أو تهيم
ما ياصلك غيره ولو إنِّك فطين
لا تغرّك الدنيا ما احد فيها مقيم
كم واحدٍ بأسبابها أمسى حزين
وعمرك مقدّر عند رحمنٍ رحيم
يالله تجعلنا من أصحاب اليمين
- الشاعر/ أحمد بن ناصر المحرج
