نصيحة أب

يا عبيد أنا خابرك ورعٍ لهالحين

داوي بغبات الجهل واظلماته

لاشك علمي لك محبة وتفطين

تسمّع الوالد وثبت وصاته

وصاة مخلوقٍ يعرف القوانين

مافات عمره بالجهل والهياته

يا عبيد انا أوصيك مني بثنتين

ثنتين هن سوّ البشر وحسناته

أوصيك لاتبحث سدود المغيبين

ولاتجهر اللي غارقٍ بغفلاته

ترى النميمة تمحق الرزق والدين

والمنزل العالي تهدم اطبقاته

لاتحسب ان أهل الظليمة بخيتين

كلٍ يوافق ما عمل في وفاته

وانذرك عن حق الضعيف المسيكين

اللي على حقه يهل اعبراته

ترى الضعيف الى غدى الليل ليلين

يدعي وعند الله توافق دعاته

الظلم فان الظلم يفنى السلاطين

ياويل راعي الظلم من مقبلاته

وانذرك عن ربعة رخومٍ هياسين

اللي سوالفهم بوده وهاته

- مرشد البذال