على عزّ الوطن مبداك
صباح الخير يا وجه الرضى يا خادم البيتين
صباح الفرحه اللي في عيون الشعب طربانه
صباحٍ ما يليق الا مع اسم السيف ابو حدّين
ولا يرتاح لين انك تجي نبضه وعنوانه
تملّكت المشاعر كلها في ظرف تسع سنين
زهتك السيره اللي من بياض الوجه مليانه
حصدت ولا حصدت إلا الغلا بعيوني الثنتين
عطيتك من حديقة خاطري ورده وريحانه
بنيت المسكن اللي ما بناه إلا انت بين اثنين
شعور الود والبال الوسيع احسنت بنيانه
سجنت ولا سجنت إلا الشقا عن شعبك الغالين
ربطت ولا ربطت إلا ابليس العود واعوانه
تنام الناس في جوف السحر يا ساهر العينين
ضمير الحي ما يَرضى يصك النوم بيبانه
ولا لك يا ولد عبدالعزيز الا الغلا هالحين
على صدر القمر ننسج حضور الطيف والوانه
تغيب وغيبتك عنا سموم القيظ والتخمين
نعد ايام غيبات الحبيب وننشد اخوانه
لو انك شفت وشلون اليتامى تصفق الكفين
عرفت انك حبيب الشعب شبعانه وجوعانه
نخيت ام القوافي لك تحطك في سواد العين
لقيتك نبض في روح الشعر تجتاح ميدانه
سحاب الخير يشحذك العطا يا معرّب الجدّين
على كفّك نبت عشب الحيا واطعمت جيرانه
عطاك الله من الدنيا وخصك في حياة الدين
وهايب ساقها لك خالق الانسان سبحانه
سقانا من سحايبك الوفيه فترة التكوين
على عز الوطن مبداك وقفه ضد عدوانه
صباح الخير من رفحا إلى نجران للتطمين
ومن ضلع الحجاز اليا الخليج اهديك قيفانه
- الشاعر/ ناصر القزلان
