السياحة الداخلية .. مصايف كايفة بين الأوطان
ياللي تقول احجز نصيّف بلبنان
أنا استخرت ورحلتي داخليه
عندي مصايف كايفة بين الأوطان
ما تحتمل مصروف زايد عليه
عندي بوسط سدير عبلة ووديان
اطلع بها في كل صبح ومسيه
وبنجد صيهد نفد وحزوم صمان
وأيضا مزارع فاكهتها طريه
وان رحت يم البحر عاني مسيان
جده من أجمل مدنا الساحلية
وانزل على مكة محرم بقلب إيمان
ابعتمر لله رب البرية
واطلع على الطايف وأبها ورغدان
وألقى الطبيعة مع روايح زكيه
وأيضا جنوب المملكة فيه جيزان
وجزيرة الفرسان ماهي خفيه
وأمر بيشه وأتيامن لنجران
وأشوف سد ضخم له فاعليه
وان جيت للوادي مزارع وريضان
يحدها من شرق نفد خليه
وانصا الحسا وألقى بها الغرس رويان
يشرب من المشروع صبح وعشيه
والساحل الشرقي به أشكال وألوان
نصف القمر له عندنا جاذبيه
والجبيل أيضا مدينه مع إسكان
وهيئة مصانع ضخمة عالميه
والنفد بالزلفي مع رياض سمنان
والمحمل والوشم لحد الحويه
وارض القصيم إبها فواكه ورمان
وأيضا نخيل حلوة سكريه
والحفر به قوه عظيمة لها شان
هو واجهة قواتنا العسكرية
وان جيت حايل لقيت تكريم ضيفان
وأجا وسلمى متقابلات سويه
وأيضا شمال المملكة فيه بلدان
من كثرها بالحيل صعبه عليه
وانصا المدينة بالحيل شفق ولهان
أدي فروض الله بمسجد نبيه
امشي صباح وليل محدٍ تبلان
كلٍ يحسب إحساب لأية خطيه
من فضل ربي ها لبلد امن وأمان
والخير واجد والعقيدة قوية
الشاعر/ حمد بن عبدالرحمن المغامس (الوردي) - سدير
