الخساير والأرباح

مابي عذر عن غلطتك لاتعذّر

سكنت هم بداخلي وقت وانزاح

إن جيت وإن ماجيت عادي تصوّر

القلب ودّع هاجسه فيك وارتاح

حسبتها والوضع كله تغيّر

عرفت كم حجم الخساير والأرباح

على التفات الشوق وجهك تنكّر

أظهرت ودّك وأنت له كنت ذبّاح

الفكر مما صار جوّه تعكّر

رفعت من قدرك وياللأسف طاح

مثل الزجاجة حبنا شف تكسّر

يوم امتلا صدره تناهيت وجراح

إن كنت ناسي حاول إنّك تذكّر

دورك معي وش كان في كل ماراح

يكفي كفى عن غلطتك لاتعذّر

مادمت ذكرى همَّها زال وانزاح

- شعر/ عبدالله بن حجاج الرشيدي