اختصار الحب

إن بعدت شوي شفني في مدارك

لا بغيت الوصل عطني راحتينك

غبت ماهو باختياري واختيارك

ناظر عيوني وتعرف قدر عينك

اختصار الحب في بعض المدارك

الوفا ينبض بعرقٍ من وتينك

في غيابك كن في صدري معارك

والصهيل اللي سمعته من ونينك

شف جبل همي على المتنين بارك

ذكريات وباقي جروح و(حنينك)

مدري وش غير مساري عن مسارك

كيف ظلّت خطوتي مرسى سفينك

راح عمري ويش باقي بتدارك

كم سألتك بس ما جاوبت وينك

انشد اللي ينبض بحبي يسارك

كم سمع مني لكلمة (فاقدينك)

قال تكفى رد لك بعض اعتبارك

العوض في ماتبقى من سنينك

كيف ألم اشلاي واودع حصارك

وكيف ارد اللي باثارك مقتفينك

روحي وقلبي وحبي بانتظارك

من زمن والكل منهم مرتجينك

- الشاعرة/ شواهق نجد