شاعر وأكثر من صورة

عز

ارفع جنابك عن مقام المذلة

لا تنزل إلا منزل العز والطيب

ورجلٍ يقصر بالمواجيب خله

وتلقى بداله من يسد المواجيب

**

حذر

في خاطري حاجة ولا ادري وش اقول

اسامر هجوسي وصمتي كلامي

احيا واموت وباب الاسرار مقفول

ادرى من اهل القيل واحفظ مقامي

**

ارباح

الناس تتبع شفها وين ما راح

واهل الصدارة يعشقون الصدارة

ياللي تحسبون الخساير والارباح

ما يربح الا من يذوق الخسارة

**

حرمان

ثلاث من لا تنوجد فيه محروم

لو كان يملك بالمصارف صناديق

فعل الوفا ومجالسة كل شغموم

وسج القفار اليا كستها الزماليق

- خليل بن هدلان