عزيز النفس

لا صدعنّك من توده وجافاك

خله وجازه بالجفا مثل صده

خله بدربه لا يخيفك وينهاك

وجازه بالاقفا لين يعرف مرده

جازه بما مدت يمينه ويدراك

وضده بمن يكره ترى ذاك ضده

لا ترتضي بالهون في كل ممشاك

وحدك وخصمك وقفه عند حده

خلك عزيز النفس والعز ماواك

وكلٍ عطه تفصيل ثوبه بقده

احرص على حسن العمل في سجاياك

واللي يعمل الخير بالخير بده

واللي يعمل الطيب لوكان ماجاك

طيبه لو انك تقصده جد جده

اسمع ندا من للمهمات ينخاك

واذا منحته لا تبيّح بسده

خص الرفيق اللي اذا جيت حياك

وان غبت عنّه ياصلك بالمودة

واللي تربص منك لايعرف آقصاك

وبابٍ يحاول منفذ منه سده

واصحا جليس السوء وياه يبلاك

يرميك في درب الشمت والمضدة

ولا تخاطب جاهلٍ يكثر الغاك

تنساق في جهله وقصدك ترده

واعرض وخلك صامتٍ واحبس ارياك

ومن لا استشارك لا تقدم بمده

وارج الذي بآمره من الكرب نجاك

اللي على يعقوب رجع موده

- الشيخ/ حمد بن سعود بن عبدالرحمن آل ثاني