زبدة الهرج
يقول بن بدران من ضيقة الحشا
طرقت من زين اللحون لحون
تسمعوا ياهل المثايل مثايلي
ولا خير في قولٍ بلا مضمون
شاعر ولي بالشعر صنعة ومعرفة
معناه جوهر واللحن موزون
عسى ماني غاوي بعرفي وصنعتي
وعسى جماهيري مهم غاوون
لاعلني من خصه الله برحمته
ولاني من اللي ذكروا يهيمون
ياسامعين القول صلوا على النبي
وخوذوا من فنون الكلام فنون
دنياك يالانسان ماهيب دايمة
فيه ضحى واهل العقل يدرون
لا بد من يومن تقفي رحايلك
وتصير من تحت اللحد مدفون
وين القرون اللي تقافت عصورها
تمحى قرون وتقتفيها قرون
في برزخٍ يارب عفوك ورحمتك
في ساعة الرجفة يبا يصحون
وكل يحاسب عن حصيله ومكسبه
ناس تفوز وناس يخسرون
دنياك لا تخدعك ياجاهلٍ بها
انظر لها استحقار وامش بهون
اقنع بما حصلت من حل عيشها
عن ما حرم يغنيك ذا و.. ادون
جود عماد الدين بالسر والعلن
ابتغ رضا ربك ولي الكون
والوالدين احذر تفرط بحقهم
حيين والا بعد ما يموتون
جميع ما سويت فيهم تحصله
اتسوي وعقبك بك يسوون
والنفس جاهدها وجود عقالها
احجز هواها حجزة المجنون
ولا تكشف عيوب البشر لو تشوفها
الناس مثلك بألسنة وعيون
ولا تجادل الجاهل ولا ترافق الردي
ولا تستمع في هرجة يقولون
وزلة رفيقك صد عنها وزلها
زلة كرم من زلها مايهون
ان حطها لك طيب وإلا أنت حطها
صدة صقر عن جيقة الحبرون
ومن يسدي اخوك الجفا غده الجفا
وعشّه منه واسقه بعدها غبون
طيبه معك ثوبٍ مكمم من الردى
لا تلبسه لو زيّنه بردون
ولا تظن بالانسان قدام تكشفه
تظن ظن ومن وراه ظنون
والسر لا تستودعه غير صاحبه
لا طار منك الناس به يدرون
الهرج لا من زاد زادت سماجته
ما قل دل وجاكم المضمون
- علي زيد البدراني
