سلطان الفخر نسل شقران
إهداء لصاحب السمو الأمير سلطان بن محمد بمناسبة اختتام فعاليات دورة كأس عز الخيل بنسخته التاسعة عشرة.
في منتجع نوفا يبين الوليده،،
في كأس عز الخيل للشعر عنوان
يختار له زايد بيوت القصيده
اللي على الميدان مضمونها بان
وسط الجزيره لافتحت الجريده
لاهنت يا عايض وبلّغ من الآن
من يعشقون الخيل جمله مفيده
قل كأس عز الخيل من كف سلطان
في منتجع نوفا يبيله وليده
للخيل فرسانٍ وللفوز فرسان
مطلبهم الناموس والراي سيده
كلٍ يمثّل ديرته لابدا الشان
وكلٍ على الطالات ينبض وريده
عشرة ميادينٍ تنافس بشجعان
في تسعة الأشواط ثارت وقيده
وبهذي الدوره لمحنا بالأعيان
من ضمنها شوطين فكره جديده
تزيد سوق الخيل في كل الاوطان
والمنتج استبشر بدعمٍ يفيده
والفوز والله شوف الأمير سلطان
اللي يمينه ماتمد الزهيده
سلطان سلطان الفخر نسل شقران
راعي الجمايل والخصايل حميده
كريم متواضع محنّك وبطران
هذا الأمير اللي فعوله تزيده
يسعى لفعل الخير في كل ميدان
والناس تشهد والمواقف عديده
كم واحدٍ من قلّة الجهد بلشان
في ظلمة الأحزان شاف النكيده
دخل على الله ثم علّم كحيلان
ومن وقفته عاش الحياه السعيده
مالوم من يدعي له بسر وإعلان
بطول العمر عسى سنينه مديده
من يدعم أهل الخيل والخيل ربحان
وسلطان دعمه ماوجدنا نديده
أكبر من التوصيف معنى وقيفان
وأكبر من أني أحسبه في قصيده
اللي بعز الخيل في هالسنه بان
فوق اثنى عش مليون جادت به ايده
ومن حاول يعدد فعايله غلطان
يبطي وهو ماطال قصدٍ يريده
وختامها ياهل الرمك فالكم زان
وفي منتجع نوفا يبين الوليده
واللي يريد الكاس من كف سلطان
يفوز بالناموس والدرب سيده
- الشاعر/ زايد حسن الحبابي القحطاني
