اتلى النهار

اتلى النهار وقبل وقت الغروبي

ساقتني القدرة على ذيك الاطلال

وناظرت من لهفة شمال وجنوبي

وهزتني الذكرى ودمع الحزن سال

وذكرت من هو غاليٍ ومحبوبي

في وسط قلبي له محبة ومنزال

الصاحب اللي شاقني ومحسوبي

ياحبني له حب من صادق البال

اقفى وضاقت بي وساع الدروبي

واهموم صدري كل يومٍ على حال

والمشكلة من حب خلي ما اتوبي

ما اتوب من حبه ولو الهجر طال

طيفه معي لو كان ماهوب صوبي

كذا من الله ما تزحزح ولا زال

اشتاق له شوق الثرى للنصوبي

واقول ما مثله شبيهٍ بالازوال

- نواف محمد الصخابرة