أنتي قصيدة

أبشري بالشعر يا شيخة دواوينه وتاجه

لو طلبتي شاعرك يكتب لك من أزرق وريده

بس أنا لاجيت اباكتب ينشغل بالي بحاجة

كيف ابكتب بك قصيدة توصفك وانتي قصيدة

لك دلال الشعر وغيابه وتعقيدة حجاجه

بك تغليه وجموحه وابتسامته العنيدة

لك حضور النور والفجر وتفاصيل انبلاجه

واسمه ورسمه وذعذاعه وطلاّته وعيده

تذهلين الخيزران بسمح قدّك واعوجاجه

تسلبين الريم فزّاته ولفتاته وجيده

تشبهين الما ولا انتي (ما) ولو فيك ارتجاجه

لا تشاقى طفل يلمس صفحته باصابع ايده

لا تزمّي الورد في ثغرك ويتعكّر مزاجه

من غواية شاعر ما انتي بطفلته الوحيدة

وادمحي للشاعر المتلعثم ذنوب انحراجه

والله ان الجرح الاوّل لكن الطعنة جديدة

شاعرك ما خاف جرحه ما يخاف الاّ علاجه

لا يريد اللي يقول ولا يقول اللي يريده

ما دخل في سوقٍ الا بعد ما يعرف خراجه

والنخل ساسه تحت لاقدام وعذوقه بعيدة

ما علينا..كلما اشتد البلا قرب انفراجه

طعنة ما تذبح الرجال يا (نورة) تفيده

بعض ما فيني كتبته وان بقى في القلب حاجة

لك على الخاطر كلام ولك على بالي قصيدة

- علي السبعان