القلب والدف

تلعب وأنا.. ما عاد لي بالطرب شف

لعبك بروحي بدل الفرح بجراح

زل الطرب يا موجع الطار بالكف

شابت قوافي الليل .. نور الضحى لاح

كانك تدق القلب .. دقك على الدف

عسى الضلوع توقي القلب لا طاح

شفتك.. ولا أدري من قضب بعدك الصف

ناسٍ كثير .. وكنهم عندي أشباح

نورك دعاني وعندك الشوف وقف

كنه فنارٍٍٍ لاح في عين ملاح

من له ثمان اسنين من راح ما انكف

خلّى السفين وعارض الموج سباح

من فرحته ما حسب الحيل يتلف

غلب عليه الموج والقاع منزاح

- الأمير بدر بن عبد المحسن