حلاة الشي
يقول من يهوى ركوب المسرجات
لاجيب طاري للسيوف وسلّها
ياسامعي والاولة من لوّلات
تنبيك عن باقي علومي كلها
ترى حلاة الشي لاجاله طرات
واللي تجي في حلها في حلها
شبّه وبرّاد وثلاث مهيّلات
هاذيك اركدها وذيك ازلها
فلة حجاج وطيب راس وطيب ذات
ياقلها في وقتنا ياقلها
في ذمتي ذمة كأن المفردات
تصيح باسمي يابن عارج سِلّها
والله لا اعديها حدود النايفات
مادمت اميّز دقها من جلها
والكلمة اللي جات ما ادري كيف جات
زلّه وشرهتها على من زلّها
ياللي تقول النوم اخير من الصلاة
شوري عليك ادّ الفروض وصلها
يامل قلبٍ بين ود وبين هات
والعين من كثر السهر ياملّها
لاجيت بانسى واعتبر مافات مات
استرجع افكار الحزن واحتلها
وابكي على الفرقا ولكن في سكات
ماهوب شرط ان الدموع اهلها
عليك يانبضي ويا سر الحياة
ياللي غلاها عَزها ما ذلها
شيخة بنات وعلّمي كل البنات
سبحة غلانا مانويت أفلها
مالك غنى عني وانا مالي غناة
والحاقدة منهم تموت بغلها
ريقك عسل واساوره سكر نبات
وشفاك ماتبخل عليه بظلها
انتي صفاتك غير عن كل الصفات
اضيع فيها لابغيت ادلها
لبّى البراقع والغطاوي والعباة
يازين سكبتها ومصعب شلها
عندي ثلاث أشياء في قلبي ثبات
والله ما اخليها لاقالوا خلها
شوفك وشوف الما وممشى فالنبات
لا خيروني قلت أبيها كلها
- سالم جخير
