زيف الوجيه
ايه جهز لنا الموتر فداك السفيه
وانت راع المخوه لازهمتك خوي
فوق شاصٍ اليا ضاق المدى ننتخيه
مسندك يشبه ذويبان يوم يعوي
دق سلفه تسمع نغمته يالنبيه
يطرب اللي بوصل النايفه مهتوي
ان نطحته تقول الله واكبر عليه
وان قفيته تردد حيل ربي قوي
ينتخي لك شجاعه كل ما قلت هيه
والمراديم لها بالجو برق ودوي
عل دهم السحايب كل وادي تجيه
والصحاري برحمة خالقه ترتوي
ملت النفس يامشكاي زيف الوجيه
والمدينة بميسمها كوتني كوي
ودنا ياعضيدي والسفر مشتهيه
يكفي اني من الضيقه سنه منطوي
ابعد الشوح والدرب الردي مانبيه
مايشيل الثقايل غير زند بدوي
محزمك والثمينه لاشرت تشتريه
يوم غيره طريقه بالردى ملتوي
اطوي الارض واللي فات لاتحتريه
والوي ذراع ظرفك بالعزيمه لوي
لوتهب الهبايب خيلها نمتطيه
ومايهمك كتاب احذر وما يحتوي
مالنا غير ربٍ بالوزى نرتجيه
وكّله دام قلبك هاويٍ منتوي
وقول يانفس بسك والعنا ودعيه
واطوي اللي مضالك ياعنيده طوي
شاعرٍ عاف هالدنيا وغسّل يديه
والمعاناة ناره يشتويبه شوي
ودام شعري مزخرف بالذهب والجنيه
في ظلام الليال السود يضوي ضوي
واترك دروب حظٍ عاقدٍ حاجبيه
ما بكتله مداين ما ضحك للقروي
وانت ياراعي الوقفات رايك وجيه
مابقى للمخوه غير مثلك خوي
الشاعر: سعيّد العمودي - حائل
