عانيت

يا الله انا في ساعة الضيق راجيك

وفي كل يوم اطلبك تلطف بحالي

انت الامل واقدار الايام بيديك

وتعلم بما تخفيه سود الليالي

عشت العمر وايام عمري مشاويك

والحزن اشوفه ما يفارق خيالي

وعانيت من هاذي وعانيت من ذيك

اهموم لو توزن بوزن الجبالي

غديت فيها اسير هم وشرابيك

ومنها تشتت كل شي ٍ ببالي

وضاقت علي منها جميع المساليك

وعندي تشابه كل مرٍ وحالي

تجارب الدنيا والايام تنبيك

ياقلب مما شفت ما عشت سالي

اصبر على وقتك ولو كان حاديك

والحمل ما ينقله غير الجمالي

والايام تاخذ منك حاجه وتعطيك

درسٍ يفيد محنكين الرجالي

- نواف بن محمد الصخابره