موت الدموع
خل الغياب يعلمك كل ماطآل
موت الدموع بعزها وبشرفها
أللي بقت بعدك وسط عين رجال
هد الزمن حيله وهو ماذرفها
وآقف على باب الرجاوي ولآمال
يوم الحصون يدكها من جرفها
النفس تجمح لكن العقل خيال
إيعنها من ضيقها ويحرفها
آذآ هجدها تالي الليل غربال
كنْت صدا صيحاتها في طرفها
بـِ إيمانها لحمول الآيام تحتال
وفي صبرها كن الهموم تعرفها
تقبل على مايرضي الله بإجلال
وتصد عما يغضبه من سرفها
لو الشقا سوابها مثل الاطلال
اللي حزن ذا الناس كله كرفها
بقّيت مثل ماهي من الجال للجال
والناس مابه شي عنهم صرفها
توزعو بـآطلالها ألوآن وآشكال
اللي تغرف الحزن ، واللي غرفها
مات الامل في خلق ربي ولازال
باللي خلق فيها الحياه و عرفها
فأن شفت في ليل اللقا بادي هلال
قل للحياه الله يحيي ترفها
واللي تطيح من الفرح طيحت آثقال
آغلى مايملكه الفقير وصرفها
بقْيت رغم طول الجفا قدر رجال
هد الزمن حيله وهو ماذرفها..!!
- مانع الوايلي
