أوبريت الجنادرية (29) .. (كوكب الأرض)

أطيب تحيه واحترام .. لخادم البيت الحرام

مليكنا اللي قالها .. أسأل عليكم قبل أنام

حي السؤال ومن سئل .. حنا بديرتنا أهل

في أرضنا سيرة نبي .. والخير فينا للأزل

* * *

أرضي اللي صحاها الفجر .. قامت وصلت ركعتين ..

تعطي وعند الله الأجر .. ما تحسب المعروف دين ..

أرضي ومن عز النخيل .. جابت شموخ رجالها ..

رمضاء ولا ردت دخيل .. جاء يستجير ظلالها ..

أرضي تراث الأنبياء .. وأجزل بيوت القاصدين ..

مهد الرسالة الداعية .. للخير في دنيا ودين ..

* * *

يا أهل السعودية الكرام .. يا نار يا برد وسلام

الله يعّز بلادنا.. والله يغفر للإمام

جيلٍ يجي وجيلٍ يروح .. يرحل جسد وتعيش روح

والراية اللي وحدت .. رب السما بأرضه تلوح

* * *

أنا سعودي الهوى والهويه

وأهلي من الساحل إلى الساحل أبطال

تضرب لنا الدنيا سلام وتحيه

لأننا واحد على قلب رجال

ما نعرف الفتنة ولا الطائفية

حنا ندين العنف في كل الأشكال

والمملكة بالله صعبه قويه

وبنور شرع الله تباهى وتختال

اللي عطانا الخير رب البريه

سبحانه وغير على الباديه حال

بترول يالله مد عمره وحيه

قصه وفيها حكمة اللي لها قال

* * *

الحمد للفرد الصمد .. يا ديرتي ربك كريم !!

واللي إنتي أمه يا بلد .. ماضنتي يصبح يتيم !!

حنا حواليك وهلك ..

وافين بايعنا ملك ..

ونمد لك كف الرضا ..

نزعل على من زعلك ..

يا أمنا ياللي تحت ..

أقدامها طهر الحياه ..

صحيتي الدنيا على صوت المآذن والصلاه ..

يا مؤمنه يا طيبه ..

أقسى ما فيك الحنان !!

وحدودك المتراميه ..

أطرافها أمن وأمان !!

رضاك يا أمي علي .. طمعان بالجنه أفوز

يا حب من صرخة وليد .. للشيب في راس العجوز

* * *

يا أغلى خمس حروف تكتب سعودي

في كل حرف يبان للطيب قيمه

السين سيفيني ونخلة جدودي

هذا شعار أهل الوفا والعزيمه

العين عبدالله اللي أعطى وجودي

بين الأمم هيبه وقدر وحشيمه

الواو ويل اللي يلامس حدودي

عهدٍ علّي ليذوق مر الهزيمه

الدال دين الله وكثرة سجودي

سر الخصال اللي في شخصي كريمه

الياء يا دارٍ بها أشتد عودي

الحب والتقدير لك يا عظيمه

* * *

يا وطن قلبك كبير .. حاني أعطاني كثير

الله ثم أنت ومليك .. اللي تقولونه يصير

يا تفاصيل الحياه .. واختصاري في ثراه

يا وطن كنا صغار .. وما كبرنا إلا معاه

يا أعز من العيون .. يا طمأنينة وسكون

غالي ولا ترخص ولا .. حفنه من ترابك تهون

يا أرق من النسيم ،، يا وطن شعبه عظيم

بالله لا ننسى الدعاء ،، بالخير للرأس الحكيم

* * *

الله خلقنا أحرار والله فطرنا

فطره سليمه يوم جينا مواليد

شلنا الصحاري بالعيون وعبرنا

لين السواحل عانقت ضامي البيد

واللي بهذا الكون زاد وشهرنا

جمع الحضارة واحترام التقاليد

في أكرم التاريخ تبقى صورنا

أصحاب مبدأ نبني العز ونشيد

حنا هل الواجب وقمة فخرنا

في دارنا ميقات أغلى المواعيد

المعتمر والحاج لجله سهرنا

في خدمته نسعى من العيد للعيد

* * *

نحمد اللي وحد الصف وجمع ..

ياخليج العز فيما بيننا !!

الطواري برقها يوم لمع ..

ما ارتكا للحمل غير ايديننا !!

شافنا من شاف وسامعنا سمع ..

للجزيره درع يحمل سيفنا !!

دون من عادا ودون اللي طمع ..

يبذل الغالي رخيص لعيننا !!

* * *

السياسه عندهم متلونه ..

والسياسه عندنا تشرق بياض !!

لا شكى العالم مشاكل مزمنه ..

العواصم تلتفت صوب الرياض !!

الحلول تصير معنا ممكنه ..

كلمة أهل الحق ما تلقى اعتراض !!

ودارنا باللي حكمها مؤمنه ..

يبعد العدوان خالين الوفاض !!

* * *

يُحسب لأبومتعب حوار الحضارات

ودّا التسامح لين أبعد حدوده

لو تختلف لهجه ولون وديانات

الخير في الإنسان قيمة وجوده

تشهد لنا القمه على مر الأوقات

يشهد لنا الأقصى ويشهد صموده

إذا التزمنا في بنود وقرارات

ما مثلنا اللي وافياً في عهوده

يا دارنا صرتي وصرنا منارات

غصن السلام إنتي وحنا وروده

ما للحمام إلا في بيت الله يبات

وما للسلام إلا ملكنا يقوده

* * *

يا كوكب الأرض يا حظك ..

كل الكواكب يحّسدونك !!

المملكه جات في أرضك ..

وبفضلها قرت عيونك !!

يا دار كلك على بعضك ..

ما نقدر نعيش من دونك !!

طولك يساوي غلا عرضك ..

وإحنا معك لا يهمونك !!

بقلوبنا والهوى نبضك ..

مواطنك صار مفتونك !!

يا صايمه مصليه فرضك ..

الله يحميك ويصونك !!

* * *

حظ العصا في لمسة إيديك حظاه ..

تمشي معك درب الوفا اللي سلكته ..

شعبك كريم ودين الإسلام رباه ..

وانت اللي أكرمت الكريم وملكته ..

سر العصا مكتوب والناس تقراه ..

موجز حكاية جهد مخلص بذلته ..

الطيب يوم إنه يدور رعاياه ..

بينك وبين الناس جيت وقسمته ..

ما تنظر لزخرف ولا تنظر لجاه ..

همك رضا ربك وغيره تركته ..

إذا تكلم خادم البيت طعناه ..

وإذا سكت طعناه حتى بصمته ..

* * *

يا محقق الرقم الصعب !!

اسمحلي حبيت أسألك ..

وشلون صرت أنت الشعب ؟!

والشعب خليته ملك ..

يا تاج راس أهل الوفا ..

يا بلسم لشعبك شفا ..

مادمت يالغالي بخير ،، حسّك على الدنيا كفى !!

جينا نعاهدك ونزيد ..

ونقول للكون ونعيد ..

إنك سكنت قلوبنا ،، والرأي رأيك يا سديد !!

سلمان يالعهد الأمين ..

كفك غصون الياسمين ..

عشت ويسارك ما درت ،، عن ما تمده باليمين !!

يابوفهد كلك جميل ..

نلحق جزاتك مستحيل ..

يامعلم الناس الوفا .. فزعتك لأخوانك دليل !!

والنائب الثاني سداد ..

وقت الله الله والشداد ..

مقرن على الهقوه يزود .. ولا يجيب إلا الوكاد

رؤية و كلمات: عبدالله أبو راس - ألحان : ناصر الصالح

أداء: محمد عبده - عبدالمجيد عبدالله - راشد الماجد - ماجد المهندس